एजेन्सी – केहि खेल मिडियामा आएका खबर अनुसार प्रिमियर लिग क्लब म्यानचेस्टर युनाइटेडले रियल म्याड्रिडका प्रशिक्षक कार्लो एन्सेलोटीलाई क्लबको जिम्मेवारी दिन चाहेको छ।
सिजनको कम्जोर सुरुवात पश्चात युनाइटेडले रियल प्रशिक्षक कार्लो एन्सेलोटीलाई क्लबको जिम्मेवारी दिन चाहेको केहि युरोपेली मिडियाहरुले दावी गरेका हुन्।
गत सिजन राम्रै प्रदर्शन गरेपनि युनाइटेड जारी सिजनमा कम्जोर प्रदर्शन गरिरहेको छ। यस सिजन युनाइटेडले सबै प्रतियोगितामा ९ खेलमा पराजय भोगिसकेको छ।
युनाइटेड च्याम्पियन्स लिगबाट आउट हुने संघारमा छ। युनाइटेडले च्याम्पियन्स लिगका ५ खेल मद्ये एक खेलमा मात्रै जित निकालेको छ। त्यस्तै प्रिमियर लिगमा युनाइटेडले १३ मध्ये ५ खेलमा हार बेहोरेको छ।
युनाइटेडको कम्जोर लय जारी रहेमा प्रशिक्षक एरिक टेन ह्यागको पद धरापमा पर्न सक्छ। प्रशिक्षक परिवर्तन गर्न परेमा एन्सेलोटीलाई भित्र्याउन क्लबले चाहेको बताइन्छ। यधपी एन्सेलोटी ब्राजिलको राष्ट्रिय टोलीमा आवद्ध हुने चर्चा पनि जगजाहेर छ।
