एजेन्सी – फ्रेन्च स्टार करिम बेन्जेमा साउदी अरेबिया पुगेको एक सिजन पनि बितेको छैन। तर साउदी पुगेको आधा सिजनमै उनले क्लब छाड्ने चर्चा चल्न थालिसकेको छ।
साउदी क्लब अल इत्तिहादसंग बेन्जेमाको सम्बन्द बिग्रिएको खबर आइरहेका केहि मिडियाहरुले बेन्जेमा प्रिमियर लिग जान सक्ने सम्भावना रहेको खुलासा गरेका छन्।
टिमटकले गरिरहेको दावीलाई मान्ने हो भने बेन्जेमालाई प्रिमियर लिग क्लब आर्सनलले भित्र्याउन चाहेको छ। बेन्जेमालाई आर्सनलले लोनमा छोटो अवधिका लागि भित्र्याउन चाहेको टिमटकले जनाएको छ।
आर्सनल प्रशिक्षक मिकेल अर्टेटाले फ्रान्सका पूर्व अन्तर्राष्ट्रिय बेन्जेमालाई लिएर सकारात्मक रहेको र क्लबको गोल खडेरीलाई समाधान गर्न इच्छुक रहेको बताइएको छ।
गनर्सहरू जनवरी ट्रान्सफर विन्डोको दौडान टोलीको आक्रमणमा थप फायरपावर थप्न उत्सुक छन्। गेब्रियल जेसस, एडी न्केटिया र काई हाभर्ट्जले गोल गर्न नसक्दा आर्सनललाई भरपर्दो गोल गर्न सक्ने खेलाडी चाहिएको अवस्था छ।
