एजेन्सी – फ्रान्सका पूर्व अन्तर्राष्ट्रिय लाउरे बुलेउले फ्रेन्च लिग वान बारे गरेको टिप्पणीलाई लिएर पोर्चुगिज स्टार क्रिस्टियानो रोनाल्डोको कडा आलोचना गरेकी छन्।
एक कुराकानीका क्रममा रोनाल्डोले लिग वान बारे गरेको टिप्पणीलाई बुलेउले खण्डन गरेकी हुन्। क्यानल+को क्यानल फुटबल क्लबमा बोल्दै बुलेउले लिग वानलाई किन आक्रमण गर्ने भन्दै प्रश्न गरिन्।
अर्जेन्टिनी स्टार लियोनेल मेस्सीले लिग वानमा खेलेका कारण रोनाल्डोले लिग वान माथि आक्रमण गरेका हुन् कि भन्ने शंका सो कुराकानीका क्रममा बुलेउले व्यक्त गरिन्।
“रोनाल्डोको कुराकानीले म छक्क नै परें। किन लिग वान माथि आक्रमण गर्ने ? किन कि लियोनेल मेस्सी यहाँ खेले? अरु लिगहरुलाई उल्लेख नगरेर किन लिग वान बारे बोल्नु?”,बुलेउले भनिन्।
आफूले नखेलेको लिग बारे बोलेर रोनाल्डोले ठीक नगरेको उनको भनाई छ। साउदी प्रो लिगका खेलहरु हेर्दा लिग कतिको राम्रो छ भन्ने कुरा स्पष्ट हुने उनले बताइन्।
उनले भनिन्,”यो लिग बाहेक धेरै अन्य लिगहरूमा उनले खेलेका छन्। तर खेल्दै नखेलेको लिग बारे टिप्पणी गर्नु राम्रो होइन। साउदी लिगका खेलहरु हेर्दा रोनाल्डोको भनाई सत्य हो कि हौइन थाहा भइहाल्छ। रोनाल्डोको म शुभचिन्तक हुँ, तर उनीमा ठूलो अहंकार छ”
