एजेन्सी – स्पेनिस महारथी रियल म्याड्रिड स्पेनिस लालिगाको शिर्ष स्थानमा उक्लिएको छ। लालिगाको जारी सिजनको २१ औं खेलमा जित निकाल्दै रियल शिर्ष स्थानमा उक्लिएको हो।
रियलले शनिबार राति अवे खेलमा लास पालमासलाई २-१ को गोल अन्तरले पराजित गर्यो। रियलले शनिबार लास पालमास माथि कम्ब्याक जित निकाल्न सफल भएको हो।
रियलका लागि भिनिसियस जुनियर र औरेलिन चुवामेनीले गोल गर्दा घरेलु टोलीका लागि जाभियर मुनोजले एक गोल गरेका थिए। खेलमा भएका सबै तीन गोल दोस्रो हाफमा भएका थिए।
पहिल हाफमा कुनै टोलीले गोल गर्न नसकेपनि खेलको ५३ औं मिनेटमा जाभियर मुनोजको गोलबाट घरेलु टोलील अग्रता लिएको थियो। उनले सान्ड्रो रमिरेजको पासमा गोल गरेका थिए।
६५औं मिनेटमा एडवार्डो कामाभिंगाको पासमा गोल गर्दै भिनिसियस जुनियरले रियललाई खेलमा फर्काए। रियलबाट दोस्रो गोल खेलको ८४औं मिनेटमा आयो।
टोनी क्रुसको कर्नरमा चुवामेनीले हेडर मार्फत गोल गर्दै रियलको जित पक्का गरे। जित पश्चात रियलले २१ खेलबाट ५४ अंक बनाएको छ। रियल दोस्रो स्थानको जिरोना भन्दा २ अंकले अगाडी छ भने तेस्रो स्थानको बार्सिलोना भन्दा १० अंकले अगाडी छ।
