एजेन्सी – इन्टर मियामीले मेजर सकर लिगको नयाँ सिजनमा सुखद सुरुवात गरेको छ। मेजर सकर लिगको नयाँ सिजनको पहिलो खेलमा इन्टर मियामीले सहज जित निकालेको हो।
मेजर सकरको पहिलो खेलमा मियामीले बिहिबार बिहान रियल साल्ट लेकलाई सहजै पराजित गर्यो। चेज स्टेडियममा मियामीले साल्ट लेक माथि २-० को जित निकाल्यो।
बलमा राम्रो नियन्त्रण राखेको मियामीले पहिलो र दोस्रो हाफमा एक-एक गोल गरेको थियो। बलमा मियामीको कुल ५६ प्रतिशत नियन्त्रण थियो। मियामीको तर्फबाट खेलभर कुल १५ प्रहार भएका थिए।
जसमद्ये ८ प्रहार टार्गेटमा थिए। त्यस्तै पाहुना टोलीले कुल १७ प्रहार गरेको थियो। जसमद्ये २ प्रहार टार्गेटमा थिए। तर कुनै पनि प्रहार गोलमा भने परिणत भएनन्।
खेलको ३९ औं मिनेटमा रोबर्ट टेलरको गोलबाट मियामीले अग्रता लिएको थियो। सो गोलका लागि असिस्ट अर्जेन्टिनी स्टार लियोनेल मेस्सीले दिएका थिए।
त्यस्तै खेलको ८३ औं मिनेटमा मियामीले दोस्रो गोल गर्यो। सो खेल डिएगो गोमेजले गरेका थिए। सो गोलका लागि असिस्ट यसै सिजन मियामी पुगेका लुइस सुआरेजले दिएका थिए।
