एजेसी – अर्जेन्टिनी स्टार लियोनेल मेस्सी बिनाको अर्को खेलमा मेजर सकर लिग क्लब इन्टर मियामी बराबरीमा रोकिएको छ। आइतबार बिहान मियामी न्यूयोर्क सिटीसँग बराबरीमा रोकिएको हो।
आइतबार बिहान चेज स्टेडियममा भएको खेलमा १-१ को बराबरी खेल्दै मियामी र न्यूयोर्कले एक-एक अंक बाँढे। खेलको सुरुवातमा लिसकेको अग्रता मियामीले जोगाउन सकेन।
खेलभर बलमा मियामीले राम्रो नियन्त्रण राखेको थियो। बलमा मियामीको ५७ प्रतिशत नियन्त्रण थियो। खेलभर घरेलु टोलीको तर्फबाट कुल १६ प्रहार भएका थिए।
जसमध्ये ६ प्रहार टार्गेटमा थिए। तर एक मात्र प्रहार गोलमा परिणत भयो। मियामीका लागि एक मात्र गोल लुइस सुआरेजले गरेका थिए। त्यस्तै पाहुना टोलीले भने १० प्रहार गरेको थियो।
जसमध्ये ३ प्रहार टार्गेटमा थिए। न्यूयोर्कका लागि एक मात्र गोल अलोन्सो मार्टिनेजले गरेका थिए। खेलको १४ औं मिनेटमा सुआरेजको गोलबाट मियामीले अग्रता लिएको थियो।
खेलको ३४ औं मिनेटमा मार्टिनेजले बराबरी गोल फर्काएका थिए। त्यसपछि खेलको अन्त्य सम्म कुनै टोलीबाट गोल हुन सकेन।
