एजेन्सी – स्पेनिस महारथी रियल म्याड्रिडले लालिगामा सहज जित दर्ता गरेको छ। आइतबार राति रियल म्याड्रिडले लालिगामा एथलेटिक क्लब माथि सहज जित निकालेको हो।
आइतबार राति घरेलु मैदान सान्टियागो बर्नाबेउमा भएको खेलमा रियलले एथलेटिक क्लबलाई २-० को गोल अन्तरले पराजित गर्यो। पहिलो हाफमा एक र दोस्रो हाफमा एक गरी रियलले २-० को जित निकालेको हो।
रियलको जितमा दुवै गोल ब्राजिलियन युवा स्टार रोद्रिगोले गरे। उनले खेलको ८ औं मिनेटमा गोल गर्दै रियललाई सुरुवाती अग्रता दिलाएका थिए। उनले ब्राहिम डियाजको पासमा गोल गरेका थिए।
त्यसपछि पहिलो हाफमा कुनै टोलीबाट थप गोल भएनन्। तर खेलको ७३ औं मिनेटमा रोद्रिगोले व्यक्तिगत र टोलीका लागि दोस्रो गोल गरे। सो गोल उनले जुड बेलिङ्घमको पासमा गरेका थिए।
आइतबारको जितसंगै रियल म्याड्रिड लालिगा उपाधिको थप नजिक पुगेको छ। लालिगा सिजनका ३० खेलमा रियलले अहिले सम्म २३ खेलमा जित निकाल्दा एक खेलमा हार बेहोरेको छ।
त्यस्तै रियलले ६ खेलमा बराबरी खेल्दा ७५ अंक जोडेको छ। रियल दोस्रो स्थानको बार्सिलोना भन्दा स्पष्ट ८ अंकले अगाडी छ। पराजित एथलेटिक क्लब ५६ अंक सहित चौंथो स्थानमा छ।
