एजेन्सी – स्पेनिस क्लब रियल म्याड्रिडका एक खेलाडी मेजर सकर लिग जाने बाटोमा देखिएका छन्। यस सिजनको अन्त्यमा सम्झौता सकिँदै गरेका एक खेलाडी मेजर सकर लिग जाने बाटोमा देखिएका हुन्।
रियल म्याड्रिडका राइट ब्याक नाचो फर्नान्डेज गर्मीमा एमएलएस जाने बाटोमा रहेको विभिन्न खेल मिडियाहरुले जनाएका छन्। उनले रियल छाड्ने लगभग पक्का भैसकेको बताइएको छ।
क्लबको क्यास्टिला एकेडेमीबाट स्नातक गरेपछि उनले रियलको सिनियर टोलीमा स्थान बनाएका थिए। उनले रियलको सिनियर टोलीका लागि सन् २०१०-११ को सिजनमा डेब्यू गरेका थिए।
नाचोले अहिले सम्म रियल म्याड्रिडका लागि कुल ३ सय ५७ खेल खेलेका छन्। यस बीचमा उनले १६ गोल गर्दै ९ असिस्ट प्रदान गरेका छन्। उनले क्लबमा चार ला लिगा र पाँच यूईएफए च्याम्पियन्स लिग सहित अन्य धेरै उपाधि जितेका छन्।
उनी र रियल म्याड्रिड बीचको सम्झौता यहि सिजनको अन्त्यमा सकिँदैछ। दुई पक्ष बीचको सम्झौता थप नहुने पक्का भैसकेको छ। जससंगै अब उनी नयाँ गन्तव्य तर्फ लाग्नेछन्।
उनी अमेरिकी मेजर सकर लिग आवद्ध हुन इच्छुक रहेको बताइएको छ। मेजर सकर लिगमा यस अगाडी देखि नै लियोनेल मेस्सी, सर्जियो बुस्केट्स र जोर्डी अल्बा जस्ता धेरै उत्कृष्ट खेलाडीहरु छन्।
