एजेन्सी – विभिन्न खेल मिडियाहरुमा आएका खबरलाई मान्ने हो भने पोर्चुगिज स्टार क्रिस्टियानो रोनाल्डो आवद्ध साउदी क्लब अल नासरले किङ कप अफ च्याम्पियन्सको फाइनल खेल अगाडी नयाँ डिमाण्ड राखेको छ।
किङ कप अफ च्याम्पियन्सको फाइनल खेलमा अल हिलालको सामना गर्नु अगाडी अल नासरले सो खेल खेलाउने रेफ्रीलाई लिएर नयाँ डिमाण्ड राखेको दावी विभिन्न खेल मिडियाहरुले गरेका हुन्।
अल नासरले अल हिलाल विरुद्धको फाइनल खेलका लागि विदेशी रेफ्री उपलब्ध गराउन आग्रह गरेको साउदीबाट प्रकाशित हुने विभिन्न खेल मिडियाहरुले जनाएका छन्।
अल नासरले किङ कप अफ च्याम्पियन्सको सेमिफाइनल अगाडी पनि यस्तै आग्रह गरेको थियो। अल नासरको आग्रह सो खेलमा केहि हद सम्म स्वीकृत गरिएको थियो।
सो खेलमा एक क्रोएसियाली रेफ्रीलाई रेफ्रीको समूहमा समावेश गरिएको थियो। सो खेल अल नासरले जित्दै फाइनलको यात्रा तय गरेको थियो। अब किङ कप अफ च्याम्पियन्सको उपाधिका लागि अल हिलालको सामना गर्दैछ।
सो खेलमा सबै रेफ्री साउदी अरेबिया भन्दा बाहिरका समावेश गरियोस् भन्ने अल नासरको माग छ।
