एजेन्सी – साउदी प्रो लिगमा शिर्ष स्थानको अल हिलाललाई पछ्याइरहेको अल नासरले सानदार जित दर्ता गरेको छ। दोस्रो स्थानको अल नासरले लिगको ३० औं खेलमा अल वेहदा माथि सानदार जित दर्ता गरेको हो।
शनिबार राति भएको खेलमा पोर्चुगिज स्टार क्रिस्टियानो रोनाल्डो चम्किएपछि अल नासर ६-० को गोल अन्तरले विजयी भयो। अल नासरको जितमा रोनाल्डोले ह्याट्रिक गरे।
त्यस्तै ओटाभियो, साडियो माने र मोहमेद अल फाटिलले एक-एक गोल गरे। अल अवाल पार्कस्थित किङ साउद युनिभर्सिटीमा भएको खेलमा अल नासरले खेलको ५ औं मिनेटमै रोनाल्डोको गोलबाट अग्रता पाएको थियो।
खेलको १२ औं मिनेटमा रोनाल्डोले गोल नै गोल गर्दा अल नासरको अग्रता दोब्बर भयो। खेलको १८ औं मिनेटमा ओटाभियोले गोल गर्दा अल नासर ३-० को अगाडी बढ्यो।
अल नासरको चौंथो गोल खेलको ४५ औं मिनेटमा साडियो मानेले गरे। खेलको ५२ औं मिनेटमा रोनाल्डोले गोल गर्दै ह्याट्रिक पूरा गरे। खेलको ८८ औं मिनेटमा मोहमेद अल फाटिलले अल नासरका लागि छैठौं गोल गरे।
यस जितसंगै अल नासरको ३० खेलबाट ७४ अंक पुगेको छ। अल नासरले साउदी प्रो लिग उपाधि जित्ने सम्भावना जिवितै राखेको छ। शिर्ष स्थानको अल हिलाल ९ अंकले अगाडी छ।
