एजेन्सी – साउदी प्रो लिगको महाभिडन्तमा अल नासर र अल हिलाल बराबरीमा रोकिएका छन्। साउदी प्रो लिगका हेभिवेटद्वय अल नासर र अल हिलाल बराबरीमा रोकिएका हुन्।
शुक्रबार राति अल नासरको घरेलु मैदानमा भएको खेल १-१ को बराबरीमा टुंगियो। अल नासरले जित्न लागिसकेको खेलमा अल हिलालले अन्तिम समयमा गोल गर्दै अपराजित यात्रालाई कायमै राख्यो।
शुक्रबार राति बलमा कम नियन्त्रण राखेपनि अल नासरले पहिलो हाफमै अग्रता लिएको थियो। खेलको पहिलो मिनेटमै ओटाभियोले गोल गर्दै अल नासरलाई अग्रता दिलाएका थिए।
त्यसपछि निर्धारित ९० मिनेट सम्म कुनै टोलीबाट थप गोल भएनन्। तर इन्ज्युरी समयमा अल हिलालले पेनाल्टीको अवसर पायो। सो अवसरलाई आलेक्स्याण्डर मित्रोभिचले गोलमा परिणत गर्दै अल हिलालको हार टारे।
यस बराबरीसंगै अल हिलालले साउदी प्रो लिगमा अपराजित यात्रालाई कायमै राखेको छ। हिलालले यस सिजन ३२ खेल खेल्दा २९ जित निकालेको छ भने ३ खेलमा बराबरी खेलेको छ।
हिलालको ९० अंक छ। अल नासरको भने ७८ अंक रहेको छ। अल नासरले ३२ खेल मध्ये २५ खेलमा जित निकालेको छ भने ४ पराजय भोगेको छ।
