एजेन्सी – साउदी क्लब अल नासरले जित सहित साउदी प्रो लिगको सिजनको सुखद अन्त्य गरेको छ। अल नासरले साउदी प्रो लिगको अन्तिम सिजनमा अल नासरले सानदार जित दर्ता गरेको हो।
आइतबार राति अल नासरको घरेलु मैदानमा भएको खेलमा अल नासरले अल इत्तिहादलाई ४-२ को गोल अन्तरले पराजित गर्यो। अल नासरको जितमा क्रिस्टियानो रोनाल्डोले दुई गोल गर्दा अब्दुलरहमान घारिव, मेसारी अल नेमेरले एक-एक गोल गरे।
अल इत्तिहादका लागि भने फारह अल समरानी र फाविन्होले एक-एक गोल गरे। पहिलो हाफको इन्ज्युरी समयको तेस्रो मिनेटमा रोनाल्डोले गोल गर्दै अल नासरलाई अग्रता दिलाएका थिए।
६६औं मिनेटमा सुवेइलेम अल मेनहालीले सिधै रातो कार्ड पाएपछि अल इत्तिहाद १० खेलाडीमा समेटियो। ६९ औं मिनेटमा रोनाल्डोले नै अल नासरका लागि दोस्रो गोल गरे।
७९औं मिनेटमा घारिवले पेनाल्टीमा गोल गरेपछि अल नासर खेलमा ३–० ले अगाडी बढ्यो। ८८औं मिनेटमा फारहले गोल गरेपछि अल इत्तिहादले खेलमा फर्किने प्रयास गर्यो।
इन्ज्युरी समयको दोस्रो मिनेटमा फाविन्होले गोल गर्दा ३-२ को अवस्थामा पुग्यो। इन्ज्युरी समयमै रोनाल्डोको स्थानमा मैदान छिरेका नेमेरले गोल गर्दा अल नासर ४-२ को गोल अन्तरले विजयी हुन पुग्यो।
