दुर्लभ रेकर्ड बनाएपछि रोनाल्डोले भने - 'म रेकर्ड पछ्याउँदिन, रेकर्डले मलाई पछ्याउँछन्' -

एजेन्सी – पोर्चुगिज स्टार क्रिस्टियानो रोनाल्डोले आफूले रेकर्डलाई नपछ्याउने बताएका छन्। रोनाल्डोले सामाजिक संजाल मार्फत आफूले रेकर्डलाई नभई रेकर्डले आफूलाई पछ्याउने बताएका हुन्।

सन् २०२२ को अन्त्यमा साउदी प्रो लिग क्लब अल नासर आवद्ध भएका रोनाल्डोले सन् २०२३-२४ सिजनको अन्तिम खेलमा सानदार प्रदर्शन गर्दै दुर्लभ रेकर्ड बनाए।

अन्तिम खेलमा २ गोल गर्दा साउदी प्रो लिगको सिजनमा रोनाल्डोको गोल संख्या ३५ पुग्यो। त्यसपश्चात उनले गोल्डेन बुट मात्र जितेनन्, उनी साउदी प्रो लिगको एकै सिजनमा सर्वाधिक गोल गर्ने खेलाडी पनि बने।

उनले यो सिजन लिगमा ३१ खेलमा ३५ गोल र ११ असिस्ट प्रदान गरे। रोनाल्डोले नयाँ कीर्तिमान बनाउने क्रममा अल नासरकै पुर्व मोरक्कन फरवार्ड अब्देरराजक हमदल्लाहको कीर्तिमान तोडे।

उनले सन् २०१८–१९ को सिजनमा ३४ गोल गर्दै साउदी प्रो लिगको एकै सिजनमा सर्वाधिक गोल गर्ने खेलाडीको रेकर्ड बनाएका थिए। तर सो रेकर्ड सोमबार रोनाल्डोले तोडे।

सो रेकर्ड तोडेपश्चात रोनाल्डोले लेखेका छन्,”म रेकर्ड पछ्याउँदिन, रेकर्डले मलाई पछ्याउँछन्”