एजेन्सी – फ्रेन्च स्टार किलियन एम्बाप्पेले अन्ततः स्पेनिस महारथी रियल म्याड्रिडसँग सम्झौता गरेका छन्। लामो पर्खाइ पश्चात एम्बाप्पेले रियलसँग ४ वर्षे करार सम्झौता गरेका हुन्।
रियल र एम्बाप्पे दुवैले सामाजिक संजाल मार्फत सम्झौता गरेको खबर सार्वजनिक गरिसकेका छन्। एम्बाप्पे र रियल बीच सम्झौता भएपछि रियल समर्थक उत्साहित छन्।
यति बेला एम्बाप्पेले कुन जर्सी प्रयोग गर्लान् भन्ने कुरामा सबैको चासो छ। विभिन्न खेल मिडियाहरुमा आएका खबर अनुसार एम्बाप्पेले रियलको पहिलो सिजन ९ नम्बरको जर्सी प्रयोग गर्नेछन्।
करिम बेन्जेमा गत गर्मीमा अल-इतिहाद गएपछि ९ नम्बरको जर्सी खालि छ। अब सो जर्सी एम्बाप्पेले पाउनेछन्। लुका मोड्रिचबाट १० नम्बरको जर्सी लिनुअघि एम्बाप्पेले ९ नम्बरको जर्सी प्रयोग गर्ने बताइन्छ।
क्लबका लेजेण्ड मोड्रिचले रियलको बसाई एक वर्ष थप गर्ने भएपछि एम्बाप्पेले ९ नम्बरको जर्सी लगाउने पक्का भएको बताइएको छ। मोड्रिचले सन् २०२५ मा फुटबलबाट सन्यास लिन सक्ने र उनले सन्यास लिएपछि एम्बाप्पेले १० नम्बरको जर्सी लगाउने स्पेनिस खेल मिडियाहरु दावी गर्छन्।
