एजेन्सी – पोर्चुगिज स्टार क्रिस्टियानो रोनाल्डोले सामाजिक संजाल इन्स्टाग्राममा नयाँ रेकर्ड बनाएका छन्। इन्स्टाग्राममा सबै भन्दा बढी फलो गरिएका रोनाल्डोले नयाँ रेकर्ड बनाएका हुन्।
फ्रेन्च स्टार किलियन एम्बाप्पेको पोस्टमा रियल म्याड्रिडका पूर्व खेलाडी रोनाल्डोले गरेको कमेन्ट इन्स्टाग्राममा सबै भन्दा बढी लाइक गरिएको कमेन्ट बनेको छ।
केहि दिन अगाडी मात्रै एम्बाप्पेले आफू रियल म्याड्रिडमा आवद्ध भएको घोषणा सामाजिक संजाल मार्फत गरेका थिए। त्यसक्रममा उनले आफ्नो सपना साकार भएको बताएका थिए।
रियल म्याड्रिडले आफ्नो सामाजिक सञ्जाल ह्यान्डल मार्फत पाँच सिजनका लागि फ्रान्सेली खेलाडीसँगको सम्झौताको घोषणा गरेको केही समयपछि एमबाप्पे पनि सामाजिक संजालमा पोस्ट गरेका थिए।
त्यसक्रममा उनले बाल्यकालक तस्विरहरु पनि सार्वजनिक गरेका थिए। जसमा रोनाल्डोले समेत प्रतिक्रिया जनाएका थिए। रोनाल्डोले सेन्टियागो बर्नब्युलाई चम्किलो बनाएको हेर्न आफू इत्साहित रहेको टिप्पणी गरेका थिए।
सो कमेन्टमा अहिले सम्म ४५ लाख भन्दा बढी लाइक आएका छन् भने ८८ हजार भन्दा बढी रिप्लाई आएका छन्।
