एजेन्सी – विभिन्न खेल मिडियाहरुका अनुसार लिभरपुल यस गर्मीमा अर्ने स्लटको नयाँ व्यवस्थापनमा रियल म्याड्रिडका दुई खेलाडीहरू भित्र्याउन इच्छुक छ।
लिभरपुलले यस समर ट्रान्सफर विन्डोमा रियल म्याड्रिडका दुई खेलाडी रोड्रिगो गोज र अर्डा गुलरलाई भित्र्याउने योजना बनाइरहेको दावी केहि खेल मिडियाहरुले जनाएका हुन्।
स्पेनबाट बाहिर आएको खबर अनुसार एनफिल्ड क्लबले आफ्नो टोलीलाई बलियो बनाउने योजनाको साथ सान्टियागो बर्नाबेउमा आफ्नो नजर राखेको छ। लिभरपुल रियलका यी दुई खेलाडीलाई भित्र्याउने योजना बनाइरहेको बताइएको छ।
लिभरपुल रोड्रिगो र गुलरलाई नजिकबाट नियालिरहेको डिपोर्टिभोले जनाएको छ। रोड्रिगो हालका वर्षहरूमा कार्लो एन्सेलोट्टीको पक्षको महत्त्वपूर्ण खेलाडीको रुपमा रहेका छन्।
तीन पटक ला लिगा उपाधि र दुई च्याम्पियन्स लिग उपाधि जितिसकेका रोड्रिगोले गत सिजन कुल ५१ खेल खेले। जसमा उनले १७ गोल गरेका थिए भने ९ असिस्ट प्रदान गरेका थिए।
अर्कोतर्फ, गुलर गत सिजन रियल मड्रिड पुगेका थिए। चोटका कारण उनले धेरै खेलहरु गुमाए।
