एजेन्सी – बार्सिलोनाका पूर्व स्टार नेयमार जुनियरले आफ्नो फाइभ ए साइड फुटबल टोलीमा आफ्ना पूर्व सहकर्मीहरुलाई समावेश गरेका छन्। एक अन्तर्वार्ताका क्रममा नेयमारले बार्सिलोनाका दुई पूर्व सहकर्मीहरुलाई समावेश गर्दै आफ्नो फाइभ ए साइड फुटबल टोली निर्माण गरेका हुन्।
छोटो क्लिपमा, नेयमारले पूर्व सेलेकाओ गोलकिपर जुलियो सेजरलाई गोलको रक्षाका लागि र थियागो सिल्भालाई डिफेन्समा छानेका थिए। त्यस्तै सो सूचीमा उनले आफू सँग-संगै लियोनेल मेस्सी र लुइस सुआरेजलाई पनि राखेका छन्।
मेस्सी र सुआरेजसँग नेयमारले सन् २०१४ देखि सन् २०१७ सम्म खेलेका थिए। बार्सिलोनामा हुँदा यी तीन खेलाडीले क्लब फुटबलका सबै ठूला उपाधि जितेका थिए।
त्यसपछि नेयमारले सन् २०१७ मा बार्सिलोना छाडेका थिए। उनी रेकर्ड २ सय २२ मिलियन युरोमा पेरिस सेन्ट जर्मेन(पिएसजी) आवद्ध भएका थिए। नेयमार पिएसजी छाडेर अहिले साउदी क्लब अल हिलाल पुगिसकेका छन्।
