काठमाडौँ – सावित्रा भण्डारी साम्बा सम्मिलित एन अभान्ट ग्वेंगाम्पले फ्रान्सेली लिगमा सिजनको पहिलो जित दर्ता गरेको छ। शनिबार ग्वेंगाम्पले आफ्नो पाँचौं खेलमा ३-२ को संघर्षपूर्ण जित निकाल्दै स्ट्रासबर्गलाई हराएको हो।
ग्वेंगाम्पले ५८ औं मिनेटमा साम्बाको गोलबाट खेलमा अग्रता लियो। तर ६३ औं मिनेटमा स्ट्रासबर्गकी लोरेना अजारोले पेनाल्टीमा गोल गर्दै खेललाई बराबरीमा ल्याइन्। त्यसपछि, ६५ औं मिनेटमा चापेलीको गोलले स्ट्रासबर्गलाई फेरि अग्रता दिलायो।
तर, त्यसको एक मिनेटमै ग्वेंगाम्पका लागि अगाथे ओलिभरले बराबरी गोल गरिन्। इन्ज्युरी समयको छैटौं मिनेटमा लेला पेनाउले निर्णायक गोल गर्दै ग्वेंगाम्पलाई जित दिलाइन्।
यो जितसँगै ग्वेंगाम्पले आफ्नो पहिलो ३ अंक जोड्दै लिगको दसौं स्थानमा उक्लिएको छ भने, स्ट्रासबर्ग २ अंकसहित ११ औं स्थानमा छ। १२ टोली सहभागी लिगमा पेरिस सेन्ट जर्मेन १५ अंकका साथ शीर्ष स्थानमा छ। साम्बा आइतवार साफ च्याम्पियनसिपमा सहभागिता जनाउन स्वदेश फर्किंदै छिन्।
