एजेन्सी – युरोकप २०२४ को छनोटमा फ्रान्सले कीर्तिमानी जित निकालेको छ। युरो छनोट अन्तर्गत समूह ‘बी’ को आफ्नो सातौं खेलमा फ्रान्सले १० खेलाडीमा समेटिएको गिब्रालटरमाथि कीर्तिमानी जित निकालेको हो।
शनिबार राति भएको खेलमा फ्रान्सले गिब्रालटरलाई १४-० ले पराजित गर्यो। गिब्रालटर माथि निकालेको १४-० को जित फ्रान्सका लागि इतिहासकै फराकिलो जित हो।
फ्रान्सको फराकिलो जितमा केलिएन एम्बाप्पेले ह्याट्रिक गर्दा किंग्सली कोमन र ओलीभर जिरुडले समान २-२ गोल गरे। १७ वर्षीय जेरी एमरीले पनि फ्रान्सका लागि गोल गर्न सके।
फ्रान्स यसअघिनै युरोकपका लागि छनोट भइसकेको छ। फ्रान्स समूह ‘बी’ मा २१ अङ्कका साथ शीर्ष स्थानमा रहेको छ भने दोस्रो स्थानमा रहेको नेदरल्यान्ड्सले पनि युरोकपका लागि छनोट भएको छ।
