एजेन्सी – साउदी प्रो लिग क्लब अल नासर एसियन च्याम्पियन्स लिगमा बराबरीमा रोकिएको छ। एएफसी च्याम्पियन्स लिगको समूह चरणको अन्तिम खेलमा अल नासर बराबरीमा रोकिन पुगेको हो।
बलमा राम्रो नियन्त्रण राखेर आक्रमण गर्दा पनि अल नासर इष्टिकलोलसंग १-१ को बराबरीमा रोकिन पुग्यो। घरेलु टोलीका लागि अलीशेर जालिलोभले गोल गर्दा अल नासरका लागि अब्दुलरहमान अब्दुल्लाह घारीबले गोल गरे।
अल नासर पहिलो हाफमा पछि परेको थियो। खेलको ३२ औं मिनेटमा घरेलु टोलीका लागि अलीशेर जालिलोभले गोल गरेका थिए। पछि खेलको ५० औं मिनेटमा घारीबले बराबरी गोल फर्काए।
मंगलबार राति अल नासरले क्लबका स्टार क्रिस्टियानो रोनाल्डोलाई आराम दिएको थियो। अल नासर एसियन च्याम्पियन्स लिगको नकआउट चरणमा पुगिसकेका कारण रोनाल्डोले आराम पाएका थिए।
