एजेन्सी – पोर्चुगिज स्टार क्रिस्टियानो रोनाल्डोले आगामी वर्ष सन् २०२३ को जस्तै प्रदर्शन गर्ने बताएका छन्। सन् २०२३ को अन्तिम खेल खेलिसकेपछि रोनाल्डोले सन् २०२४ मा पनि राम्रो प्रदर्शन गर्ने प्रण व्यक्त गरेका हुन्।
शनिबार राति साउदी प्रो लिगमा अल नासरले सानदार जित निकाल्यो। अल नासरले अल तावोउनलाई ४-१को फाराकिलो अन्तरले पराजित गर्यो। अल नासरको जितमा क्रिस्टियानो रोनाल्डोले पनि गोल गरे।
शनिबार राति रोनाल्डोले गरेको गोल वर्षको ५४ औं गोल थियो। रोनाल्डो सन् २०२३ मा सबै भन्दा बढी गोल गर्ने खेलाडी हुन्। रोनाल्डोले जति गोल यस वर्ष कसैले पनि गर्न सकेनन्।
खेलपश्चात रोनाल्डोले एक कुराकानीका क्रममा वर्षभर राम्रो प्रदर्शन गर्न सकेकोमा आफू खुशी रहेको बताएका छन्। व्यक्तिगत र सामूहिक रुपमा आफ्नो लागि सन् २०२३ धेरै राम्रो गएको रोनाल्डोको भनाई छ।
“म धेरै खुशी छु, व्यक्तिगत र सामूहिक रूपमा यो मेरो लागि राम्रो वर्ष थियो। मैले धेरै गोल गरे। मैले अल-नासरको टोलीलाई धेरै मद्दत गरें र राष्ट्रिय टोलीको लागि पनि। म राम्रो महसुस गरिरहेको छु। म खुशी छु र अर्को वर्ष म फेरि यस्तै गर्ने प्रयास गर्नेछु।”,रोनाल्डोले भने।
