एजेन्सी – विन्टर ट्रान्सफर विन्डो पछि लिगका खेल सुरु हुनु अगाडी आज राति अल नासर र अल हिलाल आमने-सामने हुँदैछन्। साउदी प्रो लिगको उपाधि होडमा रहेका अल हिलाल र अल नासर मैत्रीपूर्ण खेलका लागि आज आमने-सामने हुन लागेका हुन्।
अल नासर र अल हिलाल बीचको खेल किंगडम एरेनामा हुनेछ। खेल रातको ११ बजेर ४५ मिनेटमा सुरु हुनेछ। अल हिलाल र अल नासर दुवै आज जित निकाल्ने पक्षमा हुनेछन्।
यस भन्दा अगाडी दुई क्लब बीच साउदी प्रो लिग अन्तर्गतको खेलका लागि भेट भएको थियो। सो खेलमा अल हिलाल ३-० को गोल अन्तरले विजयी भएको थियो।
रोनाल्डो खेल्ने सम्भावना कति ?
क्लबका कप्तान क्रिस्टियानो रोनाल्डोले चोटका कारण सिजन अगाडी बढ्नु भन्दा अगाडीका केहि खेल गुमाए। अल नासरले इन्टर मियामीको सामना गर्दा रोनाल्डो खेल्न सकेका थिएनन्।
तर आज भने रोनाल्डो खेल्नेछन्। चोटमुक्त भएपछि रोनाल्डो केहि दिन अगाडी मात्रै प्रशिक्षणमा फर्किएका थिए। क्लबका प्रशिक्षकले समेत रोनाल्डो अल हिलाल विरुद्ध खेल्न सक्ने बताइसकेका छन्।
