एजेन्सी – नेपाली महिला राष्ट्रिय फुटबल टोलीकी महत्वपूर्ण सदस्य सावित्रा भण्डारी ‘साम्बा’ एन अभान्ट ग्वेंगाम्पको १८ सदसिय टोलीमा परेकी छन्। शनिबार साँझ हुने अवे खेलमा डिजोन विरुद्धको खेलका लागि साम्बा प्रारम्भिक टोलीमा परेकी हुन्।
साम्बाले यस अगाडी पेरिस एफसी विरुद्धको खेलमा पहिलो पटक सुरुवाती ११ मा स्थान बनाएकी थिइन्। सो खेलमा एन अभान्ट ग्वेंगाम्पले नराम्रो हार बेहोरेको थियो।
साम्बाले एन अभान्ट ग्वेंगाम्पका लागि एक गोल गरिसकेकी छन्। साम्बा आज पनि टोलीको सुरुवाती ११ मा पर्ने सम्भावना छ। आज उनलाई गोल गर्दै गोल संख्या बढाउने अवसर छ।
जारी सिजनको १८ औं खेलमा लागि एन अभान्ट ग्वेंगाम्प आज साँझ एक्सनमा उत्रन लागेको छ। एन अभान्ट ग्वेंगाम्पले शनिबार साँझ अवे खेलमा डिजोनको सामना गर्नेछ।
खेल डिजोनको घरेलु मैदान स्टेड गैस्टन-जेरार्डमा हुनेछ। खेल नेपाली समय अनुसार ६ बजेर ४५ मिनेटमा सुरु हुनेछ। शनिबार ग्वेंगाम्प पक्कै पनि जित निकाल्ने योजनामा हुनेछ।
पछिल्लो खेलमा ग्वेंगाम्पले पेरिस एफसीसँग नराम्रो हार बेहोरेको थियो। सो खेलमा पेरिस ५-० को गोल अन्तरले विजयी भएको भएको थियो। शनिबार ग्वेंगाम्प पक्कै पनि सो हार भुलाउने प्रदर्शन गर्ने योजनामा हुनेछ।
ग्वेंगाम्प अहिले फ्रेन्च महिला लिगको १० औं स्थानमा रहेको छ। ग्वेंगाम्पले सिजनका १७ खेल खेल्दा ४ खेलमा जित निकालेको छ भने १० खेलमा पराजय भोगेको छ।
त्यस्तै ३ खेल बराबरी खेल्दै उसले १५ अंक बटुलेको छ। डिजोन भने लिगको नवौं स्थानमा छ। डिजोनले सिजनका १७ खेल खेल्दा ४ जित निलालेको छ भने ९ खेलमा हार बेहोरेको छ।
त्यस्तै ४ खेलमा बराबरी खेल्दा डिजोनको १६ अंक छ। शनिबार डिजोनलाई पराजित गर्न सकेको खण्डमा ग्वेंगाम्प नवौं वा त्यो भन्दा माथि उक्लिन सक्नेछ।
