एजेन्सी – विभिन्न खेल मिडियाहरुमा आएका खबरलाई मान्ने हो भने अर्जेन्टिनी स्टार लियोनेल मेस्सी आफ्ना पूर्व सहकर्मी तथा बार्सिलोनाका वर्तमान प्रशिक्षक जाभी हर्नान्डेजलाई अमेरिकामा तान्न चाहन्छन्।
क्याटालान आउटलेट एल नासियोनलले मेस्सीले आफ्ना पूर्व सहकर्मी र बार्सिलोनाका वर्तमान प्रशिक्षक जाभीलाई आफ्नो नयाँ क्लब इन्टर मियामीमा तान्न चाहेको दावी गरेको हो।
खबरका अनुसार मेस्सीले वर्तमान प्रशिक्षक टाटा मार्टिनोको स्थानमा जाभीलिई भित्र्याओस् भन्ने चाहेको बताइएको छ। खबरका अनुसार यस सम्बन्धमा मेस्सीले जाभीसँग पनि व्यक्तिगत रुपमा कुरा गरिसकेका छन्।
जाभीले यस सिजनको अन्त्य संगै बार्सिलोना छाड्ने घोषणा गरिसकेका छन्। बार्सिलोनाको निरन्तर कम्जोर प्रदर्शन पछि जाभीले क्लब छाड्ने घोषणा गरेका थिए।
अहिले बार्सिलोना लयमा फर्किसकेको छ। तर पनि जाभीले बार्सिलोना छाड्ने निर्णय फिर्ता लिएका छैनन्। उनका अनुसार जे जसो भएपनि उनले यस सजनको अन्त्यमा बार्सिलोना छाड्नेछन्।
मियामीले मेस्सी, सुआरेज सहित विभिन्न भेट्रान खेलाडी हुँदा पनि अपेक्षा गरिए जस्तो प्रदर्शन गर्न सकिरहेको छैन। यसै कारणले गर्दा मेस्सीले जाभीलाई मियामीमा तान्न खोजेको बुझिएको छ।
