एजेन्सी – प्रिमियर लिग उपाधि होडमा रहेको आर्सनलले अर्को सहज जित दर्ता गरेको छ। प्रिमियर लिग अन्तर्गत लुटन टाउन विरुद्धको खेलमा आर्सनलले अर्को सहज जित निकालेको हो।
बुधबार राति आर्सनलले घरेलु मैदानमा लुटन टाउनलाई २-० को गोल अन्तरले पराजित गर्यो। आर्सनलको जितमा कप्तान मार्टिन ओडेगार्डले एक गोल गर्दा एक गोल भने आर्सनलले उपहारमा पायो।
खेलभर आर्सनलले बलमा राम्रो नियन्त्रण राखेको थियो। बलमा आर्सनलको कुल ५९ प्रतिशत नियन्त्रण थियो भने आर्सनलले खेलभर कुल १३ प्रहार गरेको थियो।
जसमध्ये ४ प्रहार टार्गेटमा थिए। त्यस्तै लुटनले भने खेलभर ५ प्रहार गर्दा मात्र एक प्रहार टार्गेटमा थियो। खेलका भएका दुवै गोल पहिलो हाफमा भएका थिए।
खेलको २४ औं मिनेटमा ओडेगार्डले गोल गर्दै आर्सनललाई अग्रता दिलाएका थिए। खेलको ४४ औं मिनेटमा लुटनका हाशिओकाले आत्मघाती गोल गरेसंगै आर्सनल २-० ले अगाडी बढ्यो।
दोस्रो हाफमा कुनै पनि टोलीबाट गोल हुन सकेनन्। यस जितसंगै आर्सनल शिर्ष स्थानमा उक्लिएको छ। आर्सनलले ३० खेलमा २१ जित र ४ हार सहित ६८ अंक बनाएको छ।
