एजेन्सी – साउदी प्रो लिग क्लब अल हिलाल अर्को उपाधि नजिक पुगेको छ। सोमबार राति चिर परिचित प्रतिद्वन्दी अल नासरलाई पराजित गर्दै अल हिलाल साउदी सुपर कपको उपाधि नजिक पुगेको हो।
सोमबार राति अल हिलालले अल नासरलाई २-१ को गोल अन्तरले पराजित भयो। अल हिलालका लागि सलेम अल्दवसारी र मल्कोमले गोल गरे। त्यस्तै अल नासरका लागि भने एक मात्र गोल साडियो मानेले गरेका थिए।
पहिलो हाफमा दुवै टोलीबाट गोल हुन सकेन। तर खेलको ६१ औं मिनेटमा सलेम अल्दवसारीले गोल गर्दै अल हिलाललाई अग्रता दिलाए। खेलको ७२ औं मिनेटमा अल हिलालले अग्रता दोब्बर पार्यो।
निक्कै प्रतिष्पर्धात्मक बनेको खेलको दोस्रो हाफको अन्त्य तिर अल नासर १० खेलाडीमा समेटिन पुगेको खेलको ८६ औं मिनेटमा पोर्चुगिज स्टार क्रिस्टियानो रोनाल्डो रेड कार्ड बेहोर्दै मैदानबाट बाहिरिन बाध्य भए।
तर १० खेलाडीमा समेटिएपनि अल नासरले खेलमा फर्किन सक्दो प्रयास गर्यो। इन्ज्युरी समयमा अल नासरले एक गोल फर्कायो। इन्ज्युरी समयको ९ औं मिनेटमा अल नासरका लागि साडियो मानेले एक गोल गरे।
तर उनको सो गोलले अल नासरको हार टार्न भने सकेन। साउदी सुपर कपको फाइनलमा अब अल हिलाल र अल इत्तिहाद आमने-सामने हुनेछन्।
