एजेन्सी – केहि खेल मिडियाहरुमा आएका खबरलाई मान्ने हो भने पोर्चुगिज स्टार क्रिस्टियानो रोनाल्डोले साउदी क्लब अल नासरलाई एक अर्जेन्टिनी स्टार भित्र्याउन सुझाव दिएका छन्।
साउदी र युरोपबाट प्रकाशित हुने केहि खेल मिडियाहरुले अल नासरलाई रोनाल्डोले लियोनेल मेस्सीका सहकर्मी पाउलो डिबालालाई भित्र्याउन सुझाव दिएको दावी गरेका हुन्।
सन् २०२२ मा युभेन्टस छोडेर एएस रोमा फ्री ट्रान्सफरमा सामेल भएदेखि डिबालाले आफ्नो टोलीको लागि एक प्रमुख स्टार्टरको रूपमा आफूलाई स्थापित गरेका छन्।
डिबालाले रोमाका लागि ७५ खेलमा ३४ गोल गरेका छन् भने १८ असिस्ट प्रदान गरेका छन्।
पत्रकार लुकास गाट्टीका अनुसार, डिबाला आगामी २०२४-२५ अभियान अघि अल-नासरको सम्भावित लक्ष्यको रूपमा देखा परेका छन्। अल नासरले उनलाई आगामी समर ट्रान्सफर विन्डोमा भित्र्याउन सक्ने बताइन्छ।
मेस्सीलाई २०२२ को फिफा विश्वकप जिताउन मद्दत गरेका डिबालाले यस गर्मीमा रोमा छोड्ने विकल्प रोज्न सक्छन् किनभने उनको सम्झौता जुन २०२५ मा सकिँदैछ।
