एजेन्सी – भोलि बिहान अर्जेन्टिनी स्टार लियोनेल मेस्सी आवद्ध अमेरिकी क्लब इन्टर मियामी एक्सनमा उत्रँदैछ। मेजर सकर लिग क्लब मियामीले भोलि एटलान्टा युनाइटेडको सामना गर्नेछ।
मियामी र एटलान्टा युनाइटेड बीचको खेल मियामीको घरेलु मैदान चेज स्टेडियममा हुनेछ। खेल नेपाली समय अनुसार भोलि बिहान ५ बजेर १५ मिनेटमा सुरु हुनेछ।
पछिल्लो खेलमा मेस्सी बिना नै मैदानमा उत्रिएको मियामी भोलि भने मेस्सी सहित मैदानमा उत्रनेछ। पछिल्लो खेलमा मेस्सी मात्र नभई लुइस सुआरेज र सर्जियो बुस्केस्ट समेत खेलेका थिएनन्।
तर भोलि भने तीनै स्टार मैदानमा उत्रिन सक्छन्। मेस्सी मियामीका लागि यस सिजन उच्च प्रदर्शन गरिरहेका छन्। मियामीका लागि उनले यस सिजन मेजर सकर लिगमा १० गोल गरेका छन्।
साथै उनले १० खेलमा ९ असिस्ट पनि दिएका छन्। मियामी अहिले मेजर सकर लिगको इस्टर्न कन्फरेन्स तर्फको शिर्ष स्थानमा छ भने एटलान्टा युनाइटेड १२ औं स्थानमा छ।
मियामीले यस सिजन १६ खेल खेल्दा १० खेलमा जित निकालेको छ भने २ खेलमा पराजय भोगेको छ। त्यस्तै ४ बराबरी सहित मियामीले ३४ अंक बटुलेको छ।
एटलान्टा युनाइटेडले भने यस सिजन १४ मध्ये ३ खेलमा जित निकालेको छ भने ७ खेलमा पराजित भएको छ। त्यस्तै ४ बराबरी सहित उसले १३ अंक बटुलेको छ।
