एजेन्सी – मेजर सकर लिगमा इन्टर मियामीले सिजनको तेस्रो हार बेहोरेको छ। मेजर सकर लिगको १७ औं खेलमा मियामीले बिहिबार बिहान हार बेहोरेको हो।
बिहिबार बिहान मियामीको चेज स्टेडियममा भएको खेलमा मियामी एटलान्टा युनाइटेडसँग ३-१ को गोल अन्तरले पराजित भयो। अर्जेन्टिनी स्टार लियोनेल मेस्सी फर्किएको खेलमा मियामीले हार बेहोर्यो।
बलमा राम्रो नियन्त्रण राखेपनि गोलमा चुक्दा मियामी पराजित भयो। खेलभर बलमा मियामीको कुल ६१ प्रतिशत नियन्त्रण थियो। मियामीका लागि मेस्सीले एक गोल गरे।
पाहुना टोलीका लागि भने साबाले दुई गोल गर्दा जमल थियारेले एक गोल गरेका थिए। खेलको ४४ औं मिनेटमा साबाको गोलबाट एटलान्टा युनाइटेडले अग्रता लिएको थियो।
उनी साबाले खेलको ५९ औं मिनेटमा व्यक्तिगत तथा टोलीका लागि दोस्रो गोल गरे। मेस्सीले खेलको ६२ औं मिनेटमा गोल गर्दै मियामीलाई खेलमा फर्काउने प्रयास गरे।
खेलको ७३ औं मिनेटमा जमलले गोल गर्दा मियामी ३-१ को गोल अन्तरले पछि पर्यो। पराजय भोगेपनि मियामी १७ खेलबाट ३४ अंक बटुलेर शिर्ष स्थानमा छ। एटलान्टा १५ खेलबाट १६ अंक बटुलेर १२ औं स्थानमा छ।
