एजेन्सी – युरो कपको मुखमा फ्रान्सले सानदार जित निकालेको छ। युरो कप अगाडी आयोजित मैत्रीपूर्ण खेलमा फ्रान्सले बुधबार राति सानदार जित दर्ता गरेको हो।
बुधबार राति सेन्ट-सिम्फोरियन स्टेडियममा भएको खेलमा फ्रान्सले लक्जमबर्गलाई ३-० को गोल अन्तरले पराजित गर्यो। फ्रान्सको जितमा रान्डल कोलो मुआनी, जोनाथन क्लाउस र किलियन एम्बाप्पेले गोल गरे।
फ्रान्सले बलमा उच्च नियन्त्रण राख्दै लक्जमबर्गलाई खेलभर दबाबमा राखेको थियो। खेलको ४३ औं मिनेटमा मुआनीले गोल गर्दै फ्रान्सलाई अग्रता दिलाएका थिए।
उनले एम्बाप्पेको पासमा गोल गरेका थिए। एम्बाप्पेकै पासमा जोनाथन क्लाउसले खेलको ७० औं मिनेटमा गोल गर्दा फ्रान्सले अग्रता दोब्बर बनायो। खेलको ८५ औं मिनेटमा एम्बाप्पेले गोल गर्दा ३-० को जित पक्का भयो।
लक्जमबर्ग विरुद्ध फ्रान्सबाट भएका तीन मध्ये तीनै खेलमा एम्बाप्पेको भूमिका रह्यो। युरो कप अगाडी फ्रान्सले अब अर्को मैत्रीपूर्ण खेलमा क्यानाडाको सामना गर्नेछ।
फ्रान्स र क्यानाडा बीचको खेल आइतबार राति हुनेछ। खेल रातको १ बजे सुरु हुनेछ।
