एजेन्सी – प्रिमियर लिग क्लब म्यानचेस्टर सिटीका अर्जेन्टिनी स्टार जुलियन अल्भारेजले यहि समर ट्रान्सफर विन्डोमा क्लब परिवर्तन गर्न सक्छन्। युरोपबाट प्रकाशित हुने विभिन्न खेल मिडियाहरुले यस समर ट्रान्सफर विन्डोमा अल्भारेजले क्लब परिवर्तन गर्न सक्ने दावी गरेका हुन्।
अल्भारेज सन् २०२२ मा सिटी आइपुगेका थिए। रिभर प्लेटबाट सिटी आइपुगेपछि उनले सिटीका लागि धेरै राम्रो प्रदर्शन गरेका छन्। उनले यस बीचमा सिटीबाट क्लब स्तरमा लगभग सबै उपाधि जितिसकेका छन्।
सन् २०२३-२४ को सिजनमा उनले सिटीका लागि कुल ५४ खेल खेले। जसमा उनले १९ गोल गर्दा ५ असिस्ट प्रदान गरे। उनले सिटीका लागि कुल ३ हजार ४ सय ७९ मिनेट मात्र खेल्न पाए।
अल्भारेजले पार्ट-टाइम स्टार्टरको सट्टा आफूलाई नियमित स्टार्टरको रुपमा उभ्याउन चाहेको बताइएको छ। त्यसका लागि उनले सिटी छाडेर नयाँ गन्तव्य तर्फ लाग्नु पर्ने हुन सक्छ।
अल्भारेजका एजेन्टले हालसालै सिटीसँग उनका बारेमा कुराकानी गर्ने ट्रान्सफर बजारका राम्रा जानकार फाब्रिजियो रोमानोले जनाएका छन्। रोमानोका अनुसार एजेन्टले सिटीलाई अल्भारेजले पूरा समय खेल्ने अवसरको खोजि गरिरहेको जानकारी गराएका थिए।
अल्भारेजलाई फ्रेन्च क्लब पेरिस सेन्ट जर्मेन(पिएसजी)ले भित्र्याउन चाहेको छ।
